حمل کے دوران رات کو سونے میں دشواری ہو تو یہ اقدامات کریں اور مزے سے سوئيں

حمل ہر ماں کے لئے ایک خوشی کا وقت ہوتا ہے اور وہ اس کے لئے بہت پرجوش ہوتی ہے۔ مگر یہ سفر آسان نہیں ہوتا، یہ اپنے ساتھ بہت ساری آزمائشیں بھی لاتا ہے۔ حمل کے دوران مائیں بہت سی جذباتی اور ہارمونل تبدیلیوں کے ساتھ جسمانی تکالیف سے بھی گزرتی ہیں۔ یہ تمام تبدیلیاں حاملہ ماں کی نیند کے معیار کو بھی متاثر کرتی ہیں۔ حمل کی تین سہہ ماہیوں کے نیند کے مختلف مسائل ہیں جن سے مائیں گزرتی ہیں۔  نیند کی سب سے عام تبدیلیاں یہ ہوسکتی ہیں۔

اگر آپ کسی بھی قابل ڈاکٹر کی راہنمائی حاصل کرنا چاہتے ہیں تو ابھی مرہم ڈاٹ پی کے وزٹ کریں اور 16000 سے زائد تصدیق شدہ ڈاکٹروں کی رہنمائی حاصل کریں یا اس نمبر03111222398 پر کال کریں

پہلی سہ ماہی

 اس سہہ ماہی میں پیشاب کرنے کی ضرورت میں اضافے کی وجہ سے بار بار جاگنا پڑتا ہے۔ جسمانی اور جذباتی تناؤ کی وجہ سے نیند میں خلل آتا ہے۔ چونکہ رات کو نیند پوری نہیں ہوتی لہذا دن کی نیند اورغنودگی کی کیفیت میں اضافہ ہوتا ہے۔

  دوسری سہ ماہی

یہ سہہ ماہی حمل کے ہنی مون پیریڈ کے طور پر جانی جاتی ہے۔ اس مرحلے میں پیٹ بڑھنے اور حمل کی وجہ سے جذباتی تناؤ میں اضافہ ہوجاتا ہے۔ جو بعد ازاں نیند کی کمی کا باعث بنتا ہے۔

 تیسری سہہ ماہی

    یہ حمل کی آخری سہہ ماہی ہے۔ جس میں ماں اور بچے کا وزن بہت تیزی سے بڑھتا ہے۔ بڑھتے ہوئے پیٹ کی وجہ سے ماں کی تکلیف بھی بڑھ جاتی ہے۔ سینے کی جلن زیادہ ہو جاتی ہے۔ ٹانگوں میں درد رہتا ہے۔ اکثر ماوں کو سائنس کی تکلیف ہوتی ہے۔دل کی دھڑکن بے ترتیب رہتی ہے اور سانس پھولتا ہے۔ مثانے پر بچے کے دباؤ کی وجہ سے رات کے وقت بار بار پیشاب کرنا پڑتا ہے۔ وزن زیادہ ہونے سے ماں کو بستر پر کروٹ بدلنے میں دشواری ہوتی ہے۔

 جسمانی تکالیف کے ساتھ بےخوابی مل کر ماں کی تکلیف اور بڑھا دیتی ہے۔ ساری رات جاگ کر گھڑی کی سوئیاں گننا ایک صبر آزما مرحلہ ہے۔ اس سلسلے میں کچھ تجاویز ہیں جو آپ کی مدد کر سکتی ہیں۔

حمل کے دوران نیند نہ آنے کی سورت میں یا کسی بھی شکایت کی صوررت میں ماہر گائناکولوجسٹ سے رابطے کیلئے یہاں کلک کریں۔

حمل کے دوران آپ کو اچھی طرح سے سونے میں مدد کرنے کے لئے کچھ نکات:

   کمرے کا درجہ حرارت

پرسکون نیند کے لئے پرسکون ماحول بہت اہم ہے۔ اس لئے یہ ضروری ہے کہ آپ کا سونے کا کمرہ آرام دہ ہو، کمرے کا درجہ حرارت موسم کی مناسبت سے معتدل ہو۔ اور کمرہ آپ کی پسند کے مطابق تاریک ہو۔

   غذائیت

اچھی نیند کے لئے اچھی خوراک ضروری ہے۔ لہذا حمل کے دوران ماں کو چاہئے کہ اپنی خوراک کا خاص خیال رکھے۔  سونے سے پہلے ایک گلاس گرم دودھ اور کاربوہائیڈریٹ سے بھرپور غذا جیسے سینڈوچ سے اچھی نیند آتی ہے۔ پروٹین سے بھرپور ناشتہ مثال کے طور پر مونگ پھلی کا مکھن، انڈے وغیرہ  نہ صرف خون میں شوگر کی سطح کو زیادہ دیر تک برقرار رکھتے ہیں بلکہ سر درد اور نیند کے دوران برے خوابوں سے بھی بچاتے ہیں۔

شام کو بہت زیادہ مائعات پینے سے گریز کریں۔ نیند خراب کرنے والے کیفین سے بھرپور مشروبات جیسے چائے، کافی اور فزی ڈرنکس سے پرہیز کریں۔ یہ نیند کو متاثر کرتے ہیں اور رات میں پیشاب کو بھی بڑھاتے ہیں۔

سونے کی پوزیشن

  حمل کے دوران ماں کا وزن بڑھ جاتا ہے اور بچے کا بھی۔ جس کی وجہ سے ماں کو کروٹ بدلنے میں تکلیف ہوتی ہے۔ اس سے نیند بھی متاثر ہوتی ہے۔ لہذا بہتر نیند کے لئے یہ ضروری ہے کہ سونے کی پوزیشن آرام دہ ہو۔ آرام کرنے کی بہترین پوزیشن یہ ہے کہ گھٹنوں کو جھکا کر اپنے پہلو پر لیٹ جائیں۔

یہ پوزیشن دل کے کام کو آسان بناتی ہے اور کمر کے لیے بھی اچھی ہے۔ تکیے کو پیٹ اور کمر کو سہارا دینے کے لیے استعمال کر سکتے ہیں۔ ٹانگوں کے درمیان تکیہ کمر کے نچلے حصے کو سہارا دینے اور ایک طرف سونے کو آسان بنا سکتا ہے۔

ہلکی ورزش سے درد کو کم کرنا

ٹانگوں کا درد حاملہ ماوں کے لئے ایک عام چیز ہے۔  لہذا ٹانگ میں کھچاو یا اینٹھن کی تکلیف کے لئے ٹانگ کو دیوار کے ساتھ زور سے دبانے یا تکلیف والی ٹانگ پر کھڑے ہونے سے درد کم کیا جا سکتا ہے۔ کیلشیم اور وٹامن ای سپلیمنٹس لینے سے بھی تکلیف کم کرنے میں مدد مل سکتی ہے۔

دل کی دھڑکن کو پرسکون کرنا

اگر خون کی کمی کی وجہ سے  دل کی دھڑکن تیز ہو یا سانس لینے میں دشواری ہوتی ہو، تو آئرن سپلیمنٹس لینے سے خون کی کمی دور کرنے میں مدد مل سکتی ہے۔

تسکین حاصل کرنے کے دیگر طریقے

حمل کے دوران جسمانی تکالیف اور ذہنی تناؤ کے علاج کے لئے صحت مند سرگرمیاں اپنائی جا سکتی ہیں۔ جیسے گرم پانی سے غسل، اعضاء کی ورزش ( اسٹریچنگ) یوگا، مساج، گہری سانس لینا اور پسندیدہ کتاب پڑھنا آپ کو پرسکون  کرنے میں مدد کرتا ہے۔ تاہم، سونے سے پہلے 4 گھنٹوں کے اندر سخت ورزش سے گریز کرنا چاہیے۔

مثبت خیالات

مثبت سوچ آپ کے جسم پر بھی مثبت اثرات مرتب کر سکتی ہے۔ جب سونے کے لئے بستر پر آئیں تو اپنے ذہن کو منفی خیالات سے پاک کر کے صرف مثبت چیزوں پر توجہ مرکوز رکھیں۔ جب آپ مثبت چیزیں سوچیں گے تو اس کا اثر آپکے پٹھوں پر بھی پڑے گا۔ یوں پرسکون پٹھے، پرسکون اعصاب اور مثبت خیالات آپکو میٹھی اور پرسکون نیند سلا سکتے ہیں۔

بعض ادویات سے پرہیز کرنا

حمل کے دوران کچھ ادویات خصوصا جو ڈاکٹر کے نسخے کے بغیر استعمال کی جاتی ہیں، سے مکمل پرہیز کرنا چاہئے۔ یہاں تک کہ معالج کی تجویز کردہ ادویات میں سے بھی بعض حمل کے دوران بےخوابی کی وجہ بن سکتی ہیں۔ لہذا اگر آپ کو بھی ایسی کوئی شکایت ہوتی ہے تو اپنے معالج سے بات کریں۔

مرہم ایپ ڈاؤن لوڈ کرنے کیلئے یہاں کلک کریں۔

Android	IOS