اگر چہرے پر ہونٹوں کے پاس تل ہوں تو چہرے کی خوبصورتی بڑھ جاتی ہے، لیکن جب انہی تلوِں کے ساتھ مسے بھی ظاہر ہونا شروع ہوجائیں تو چہرے کی خوبصورتی بگڑ جاتی ہے۔
مسے آپ کی خوبصورتی پر داغ کی طرح دکھائی دیتے ہیں جو کوئی درد یا تکلیف تو نہیں دیتے لیکن یہ چہرے کی خوبصورتی کو مدہم کردیتے ہیں اور دیکھنے میں بے حد عجیب لگتے ہیں۔کچھ مسے بچپن سے ہی چہرے اور جسم کے دوسرے حصوں پر نکل آتے ہیں اور کچھ عمر بڑھنے کے ساتھ ساتھ ظاہر ہوتے ہیں۔
۔ 1مسے کیا ہوتے ہیں؟
مسے ایک جلدی بیماری اور میڈیکل کی زبان میں اسے ایکروکورڈز کہتے ہیں، اکثر جلد پر کالے رنگ کے چھوٹے بدنما ابھار پیدا ہوجاتے ہیں اسے مسے کہتے ہیں۔ یہ مرض بچوں اوربڑوں دونوں کو لاحق ہوسکتا ہے۔
مسے پھیل بھی جاتے ہیں اور چہرے اور جسم کی خوبصورتی کو تباہ کرنے میں اہم کردار ادا کرتے ہیں۔ عموما مسے تعداد میں زیادہ ہوتے ہیں اور ر جسم کے مختلف حصوں پر نمودار ہوتے ہیں لیکن یہ کسی ایک مقام پر ہجوم کی صورت میں بھی ظاہر ہوسکتے ہیں۔ اور بعض اوقات اچانک یہ خودبخود غائب بھی ہوجاتے ہیں۔
۔ 2 مسے کی وجوہات
۔ 1 مسے کا بڑا سبب وائرس کی وجہ سے سکن کا انفیکشن ہوتا ہے، جسے پیپی لومہ وائرس بھی کہتے ہیں جس سے سکن پر مسے بن جاتے ہیں۔ پہلے مسے زیادہ تر بڑی عمر کے لوگوں میں ظاہر ہوتے تھے لیکن اب یہ مسئلہ کم عمر کے لوگوں کو بھی لاحق ہو گیا ہے۔
۔ 2 کسانوں کے مسے(مسے کی ایک قسم جس میں مسے پاؤں کے تلوؤں پر ابھرتے ہیں) عام لوگوں کو سوئمنگ پول وغیرہ سے بھی ہوسکتا ہے۔
۔ 3 مسے اُبھرنے کی ایک وجہ سکن کی نشونما کے دوران رہ جانے والے کچھ نقائص ہیں جو کچھ مخصوص حصوں کو زیادہ متاثر کرتے ہیں۔
۔ 3 مسے کی علامات
مسے کی بہت سی شکلیں ہوتی ہیں تاہم زیادہ تر یہ جلد پر بڑے کھردرے ابھار کی صورت میں ظاہر ہوتے ہیں۔ یہ ابھار عموما انگلی، کہنی، گھٹنے، ,چہرے اور سر کی سکن پر ظاہر ہوتے ہیں۔جو مسے پاؤں کے تلوؤں پر ابھرتے ہیں انہیں کسانوں کے مسے کہا جاتا ہے۔ یہ زیادہ تکلیف دہ ہوتے ہیں اور متاثرہ شخص آسانی سے چل بھی نہیں سکتا۔
۔ 4 مسے کا گھریلو علاج
ویسے تو ہم مسے ختم کرنے کے لیے ڈاکٹر سے سرجری بھی کر واسکتے ہیں یا کوئی ایلوپیتھی ٹریٹمنٹ بھی لے سکتے ہیں لیکن کچھ آسان نسخوں پر عمل کر نے سے اس جلدی بیماری کا علاج ممکن ہے۔
۔ 1 سیب کے سرکے کا استعمال
سیب کے سرکہ کو مسوں کے خاتمے کا بہترین طریقہ بتایا گیا ہے۔ اس کے لیے آپ روئی کا ٹکڑا سیب کے سرکے میں ڈبو کر مسوں پر لگائیں اور تین سے چار گھنٹوں کے لیے اسے چھوڑ دیں پھر اسے اچھی طرح دھولیں۔ اس عمل کو دن میں تین دفعہ اور تین سے چار ہفتوں تک کریں۔
۔ 2 لہسن کا استعمال
لہسن کے چند ٹکڑے پیس لیں پھر پسے ہوئے لہسن کو مسوں پر لگا کر پٹی باندھ دیں اور ایک دن بعد پٹی کھولیں اور نیم گرم پانی سے دھولیں اس عمل کو کچھ دنوں تک کریں۔
۔ 3 ٹی ٹری آئل کا استعمال
ٹی ٹری آئل بھی مسوں کے لیے ایک آزمودہ ٹوٹکہ ہے۔ سب سے پہلے روئی کو پانی میں ڈبو کر نچوڑ لیں پھر اس پر تین سے چار تیل کے قطرے ڈال کر مسوں پر لگائیں اور کچھ گھنٹوں کے لیے اسے چھوڑ دیں اس عمل کو دن میں تین سے چار دفعہ اور دو سے چار ہفتوں تک کریں۔
۔ 4 انجیر کا استعمال
تازہ انجیر کادودھیا جوس بھی مسوں کے خاتمے کا بہترین علاج ہے۔ تازہ انجیر کاجوس دن میں سات سے آٹھ مرتبہ مسوں پر لگائیں اور یہ عمل دو ہفتوں تک جاری رکھیں۔
۔ 5 پیاز کا استعمال
پیاز کو بھی مسوں سے چھٹکارا پانے کے لیے استعمال کیا جاتا ہے۔ پیاز سکن پر خراش پیدا کرتی ہے اور خون کی گردش کو برقرار رکھتی ہے۔ پیاز کو کاٹ کر مسوں پر رگڑنے سے عموما مسے ختم ہوجاتے ہیں۔
۔ 5 مسے کے لیے دیگر علاج
۔ 1 ارنڈی کا تیل روزانہ رات کو سوتے وقت مسوں پر لگائیں ۔اس عمل کو ایک ماہ تک کرنے سے مسوں سے چھٹکارا پایا جاسکتا ہے۔
۔ 2 پپیتا اور انناس کے جوس اور چاک پاؤڈر کو پانی میں ملا کر مسوں پر لگانا بھی بہت موثر ہے۔
۔ 3 ہرا دھنیا کو پِیس لیں پھر اُس کا پیسٹ بنا کر روزانہ مسوں پر لگائیں۔
۔ 4 کیلے کے چھلکے کو اندر کی طرف سے مسے پر رکھ کر پٹی باندھ لیں اور ایسا دن میں دو مرتبہ کریں۔
۔ 5 تازہ مسمی کا رس روزانہ تین سے چار مرتبہ مسوں پر لگانے سے مسے ختم ہو جا تے ہیں۔
۔ 6 ایلوویرا جیل کا استعمال بھی کیا جا سکتا ہے۔
۔ 6 صحت مند غذاؤں کا استعمال
یہ تمام علاج میں سے کوئی ایک اپنانے کے ساتھ ساتھ غذائی حکمت عملی اختیار کرنا تیزی سے مسوں کو ختم کر نے میں مدد دیتا ہے۔ مسوں سے متاثرہ شخص کو سب سے پہلے کئی دن تک صرف پھل کی غذا پر رکھا جائے اور صرف جوسی پھل کھلائے جائیں جن میں انگور ، سنگترہ ، مالٹا، سیب، انناس، اور پپیتا جیسے پھل شامل کیے جا سکتے ہیں۔دن میں پانچ پانچ گھنٹوں کے وقفے سے ان پھلوں کا استعمال کیا جائے۔ بعد میں متوازن غدائیں شروع کی جا سکتی ہیں جن میں اناج ، سبزیاں، مغز وغیرہ شامل ہیں۔
مرہم کی ایپ ڈاؤن لوڈ کرنے کے لیے یہاں پہ کلک کریں
Android | IOS |
---|---|